கோலாலம்பூர், 22 நவம்பர் (பெர்னாமா) -- டிசம்பர் மாதம், கிறிஸ்துமஸ் தினம் மற்றும் மூன்றாம் தவணை பள்ளி விடுமுறையை முன்னிட்டு கேஎல் சென்ட்ரல் - பாடாங் பெசார் பயணத்திற்கான கூடுதல் 2 மின்சார ரயில் சேவையை Keretapi Tanah Melayu நிறுவனம், கேடிஎம்பி வழங்கியுள்ளது.
அந்தக் கூடுதல் சேவை, டிசம்பர் 20 தொடங்கி 29ஆம் தேதி வரை 10 நாட்களுக்கு செயல்படும்.
அதற்கான டிக்கெட்டுகள் நவம்பர் 25ஆம் தேதி காலை 10 மணி தொடங்கி விற்கப்படும் என்று கேடிஎம்பி இன்று வெளியிட்ட ஓர் அறிக்கையில் குறிப்பிட்டுள்ளது.
அந்தக் கூடுதல் ரயில் சேவைக்கு, நாளொன்றுக்கு 630 டிக்கெட்டுகள் விற்கப்படவிருக்கும் வேளையில் 10 நாட்களுக்கு மொத்தம் 6,300 டிக்கெட்டுகளை உள்ளடக்கி இருக்கும்.
அதிகமான தேவையைக் குறிப்பாக பெருநாள் மற்றும் பள்ளி விடுமுறை காலத்தில் அதற்கான கோரிக்கையைப் பூர்த்தி செய்ய இந்தக் கூடுதல் சேவை வழங்கப்படவிருக்கிறது.
வசதியான, சுமூகமான பயணத்தை வழங்குவதோடு, பயணிகளின் தேவைகள் பூர்த்தி செய்யப்படுவதை உறுதிசெய்ய சிறந்த சேவையை வழங்குவதற்கு கேடிஎம்பி உறுதி கொண்டதற்கு ஏற்ப இந்நடவடிக்கை மேற்கொள்ளப்பட்டுள்ளது.
பொதுமக்கள் டிக்கெட்டுகளை இணையம் வழியாக வாங்கிக் கொள்வதோடு, அதன் அட்டவணையையும் கேடிஎம் கைத்தொலைபேசி செயலி அல்லது அதன் அகப்பக்கத்தில் பெற்றுக் கொள்ளலாம்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
