கோலாலம்பூர், 21 நவம்பர் (பெர்னாமா) -- புதன்கிழமை பின்னிரவு புத்ராஜெயாவிலுள்ள ஒரு பேரங்காடி அருகே பெரோடுவா விவா ரக கார் ஒன்று கவிழ்ந்து விபத்துக்குள்ளானதில் அதில் பயணித்த இரு கர்ப்பிணிகள் உட்பட நால்வர் உயிரிழந்தனர்.
பின்னிரவு மணி ஒன்றுக்கு காஜாங்கிலிருந்து வந்த அக்கார், கட்டுப்பாட்டை இழந்து சம்பந்தப்பட்ட பேரங்காடியின் நுழைவுப் பாதை அருகிலிருந்த சாலைத் தடுப்புச் சுவரை மோதி விபத்துக்குள்ளாகியதாக சிப்பாங் மாவட்ட போலீஸ் தலைவர் ஏசிபி நொர்ஹிசாம் பஹாமன் இன்று வெளியிட்ட ஓர் அறிக்கையில் தெரிவித்தார்.
இச்சம்பவத்தில் அக்காரை செலுத்தியவர் உட்பட நால்வர் சம்பவ இடத்திலேயே உயிரிழந்தனர்.
நால்வரின் உடல்களும் பிரேதப் பரிசோதனைக்காக புத்ராஜெயா மருத்துவமனைக்கு கொண்டுச் செல்லப்பட்டதாக நொர்ஹிசாம் குறிப்பிட்டிருந்தார்.
இருப்பினும், விபத்துக்கான காரணத்தைக் கண்டறிய போலீசார் விசாரணையை மேற்கொண்டு வருகின்றனர்.
1987ஆம் ஆண்டு சாலைப் போக்குவரத்து சட்டம் செக்ஷன் 41 உட்பிரிவு ஒன்றின் கீழ் இவ்வழக்கு விசாரிக்கப்படுகின்றது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30 (ஆஸ்ட்ரோ 502)
