பிராக்யராஜ், 31 ஜனவரி (பெர்னாமா) -- உலகின் மிகப்பெரிய திருவிழாவான மஹா கும்பமேலாவில் ஏற்பட்ட நெரிசலில் பலர் உயிரிழந்த ஒரு நாளுக்குப் பிறகு, அப்பகுதியில் பாதுகாப்பு பலப்படுத்தப்பட்டுள்ளது.
இச்சம்பவத்தில் 30 பேர் உயிரிழந்ததொடு 60 பேர் காயத்திற்கு ஆளாகியதாக போலீசார் தெரிவித்துள்ளனர்.
ஆனால், உயிரிழந்தவர்களின் எண்ணிக்கை 50-ஐ கடந்திருக்கலாம் என்று இதர சில தரப்புகள் தெரிவித்துள்ளன.
பிணவறையில் குறைந்தது 39 சடலங்கள் இருப்பதை Reuters செய்தி நிறுவனம் கண்டறிந்தது.
எனினும், அவர்கள் அனைவரும் இந்த நெரிசலினால் உயிரிழந்தவர்கள் அல்ல என்று போலீசார் தெரிவித்தனர்.
வியாழக்கிழமை வட இந்திய நகரமான, பிரயாக்ராஜில் லட்சக் கணக்கான மக்கள் தொடர்ந்து கூடி வருகின்றனர்.
திருவிழாவிற்கு மக்கள் தொடர்ந்து வந்ததால் நகரத்தில் உள்ள ரயில் மற்றும் பேருந்து நிலையங்களில் கூட்டம் அதிகரித்தது.
இருப்பினும், பக்தர்கள் சிலர் மோசமான நெரிசலுக்குப் பிறகு பதட்டமாக காணப்பட்டனர்.
இதனிடையே, இச்சம்பவம் நிகழ்ந்து 36 மணி நேரம் கடந்து விட்ட பிறகும், காணாமல் போன தங்களின் குடும்ப உறுப்பினர்களைத் தேடி மக்கள் மருத்துவமனையிலும் சம்பவ இடத்திலும் அலைமோதுவதைக் காண முடிந்தது.
அவர்களில் சிலர், காணாமல் போன தங்களின் குடும்ப உறுப்பினர்களின் விவரங்கள் எதுவும் கிடைக்காமல் இன்னும் தேடி வருகின்றனர்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
