மின்னா, 19 ஜனவரி (பெர்னாமா) -- நைஜீரியாவின் நைஜர் மாநிலத்தின் சுலேஜா பகுதிக்கு அருகில் பெட்ரோல் நிரம்பிய கொள்கலன் லாரி வெடித்த சம்பவத்தில் குறைந்தது 70 பேர் உயிரிழந்துள்ளனர்.
ஒரு கொள்கலன் லாரியில் இருந்து மற்றொரு லாரிக்குப் பெட்ரோலை மாற்ற சிலர் முற்பட்டதை அடுத்து, இந்த வெடிப்பு சம்பவம் நேற்று நிகழ்ந்தது.
எரிபொருள் நிரம்பிய அந்த கொள்கலன் லாரி, சாலையில் தடம் புரண்டதை அடுத்து அதனைச் சேகரிக்க அங்கு மக்கள் கூட்டம் கூடியுள்ளனர்.
அப்போது, இந்த வெடிப்பு சம்பவம் நிகழ்ந்ததாக நைஜீரியாவின் அவசரகால மீட்பு நிறுவனத்தைச் சேர்ந்த ஹுசைனி இசா கூறினார்.
இச்சம்பவத்தின் போது அப்பகுதியில் இருந்தவர்களும் பலியானதாக அவர் தெரிவித்தார்.
காயமுற்றவர்களுக்கு மருத்துவமனையில் சிகிச்சையளிக்கப்பட்டு வருகிறது.
ஆப்பிரிக்காவின் அதிக மக்கள் தொகை கொண்ட நாடான நைஜீரியாவில் சரக்குகளைக் கொண்டு செல்வதற்கான இரயில் பாதைகள் இல்லாததால் அங்கு பெரும்பாலான முக்கிய சாலைகளில் விபத்துகளும் உயிரிழப்புகளும் ஏற்படுகின்றன.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
