வாஷிங்டன் டி.சி, 08 ஜூலை (பெர்னாமா) -- முன்னதாக, கடந்த ஏப்ரல் மாதம் அறிவிக்கப்பட்ட வரி விதிப்பைத் தற்காலிகமாக ஒத்தி வைத்திருந்த அமெரிக்க அதிபர் டோனல்ட் டிரம்ப் இன்று புதிய வரி விதிப்பை அறிவித்தார்.
வாஷிங்டனின் முக்கிய வர்த்தக பங்காளிகள் மீதான பொருளாதார நடவடிக்கைகளில் ஒன்றாக புதிய வரிவிதிப்பை அறிவித்துள்ள டிரம்ப் மலேசியாவில் இருந்து இறக்குமதி செய்யப்படும் பொருள்களுக்கு 25 விழுக்காடு வரியை விதித்துள்ளார்.
ஒவ்வொரு நாட்டிற்குப் பல்வேறு விழுக்காடுகளில் டிராம்ப் வரிகளை அறிவித்துள்ள வேளையில், ஆகஸ்ட் முதலாம் தேதி முதல் அது அமலுக்கு வருவதாக Truth Social எனும் சமூக வலைத்தளத்தில் பதிவேற்றப்பட்ட அதிகாரப்பூர்வ அறிக்கையில் டிரம்ப் அறிவித்துள்ளார்.
மலேசியா, ஜப்பான், தென் கொரியா மற்றும் கசக்ஸ்தான் ஆகிய நாடுகளை உட்படுத்தி இறக்குமதி செய்யப்படும் பொருள்களுக்கு 25 விழுக்காட்டு வரி விதிக்கப்படுகிறது.
மலேசியா, ஜப்பான் ஆகிய நாடுகளுக்கு எதிரான புதிய வரிவிதிப்பு விகிதம் முன்னர் அறிவிக்கப்பட்ட 24% வரியைவிட சற்று அதிகமாகும்.
தென்னாப்பிரிக்காவிற்கு 30 விழுக்காட்டு வரியும், லாவோஸ் மற்றும் மியான்மர் ஆகிய நாடுகளுக்கு அதிகபட்சமாக 40 விழுக்காட்டு வரியும் விதிக்கப்படவுள்ளன.
லாவோஸ், மியன்மாருக்கு எதிராக முறையே முன்னர் அறிவிக்கப்பட்ட 48 மற்றும் 44 விழுக்காட்டு வரி தற்போது 40 விழுக்காடாக குறைக்கப்பட்டுள்ளது.
அதுமட்டுமின்றி, எந்தவொரு நாடும் அமெரிக்க பொருள்களுக்கான வரியை உயர்த்தும் பட்சத்தில், தற்போதைய 25 விழுக்காட்டு வரி விதிப்பைக் காட்டிலும் கூடுதல் வரி விதிக்கப்படும் என்றும் டிரம்ப் எச்சரித்துள்ளார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30
(ஆஸ்ட்ரோ 502)
