திருவள்ளூர், 22 ஜூன் (பெர்னாமா) -- தமிழ்நாட்டின், திருவள்ளூர் மாவட்டம் பெரியபாளையம் அருகே தனியாருக்குச் சொந்தமான இறால் பதப்படுத்தும் தொழிற்சாலையில் ஏற்பட்ட அமோனியா வாயு கசிவால் ஐவர் உயிரிழந்துள்ளனர்.
மேலும், 70-க்கும் மேற்பட்ட தொழிலாளர்கள் பாதிக்கப்பட்டு மருத்துவமனைகளில் அனுமதிக்கப்பட்டுள்ளனர்.
நேற்று காலை வழக்கம்போல சுமார் 120 தொழிலாளர்கள் பணியில் ஈடுபட்டிருந்தபோது, குளிர்சாதனப் பிரிவில்
பயன்படுத்தப்படும் அமோனியா வாயு கசிந்துள்ளது.
சில நிமிடங்களில் தொழிற்சாலை முழுவதும் வாயு பரவியதால் தொழிலாளர்களுக்கு மூச்சுத் திணறல், கண் எரிச்சல் ஏற்பட்டுள்ளது.
இவ்விவகாரம் தமிழக சட்டமன்றத்திலும் எதிரொலித்த நிலையில், மாநில தொழிலாளர் நலத்துறை அமைச்சர் முகமது பர்வேஷ் விளக்கம் அளித்தார்.
மொத்தம் 74 தொழிலாளர்கள் பாதிக்கப்பட்டதில் 70 பேர் பெண்கள் என்றும் இதுவரை 5 பெண்கள் உயிரிழந்துள்ளதாகவும் அவர் தெரிவித்தார்.
சிலரது உடல்நிலை கவலைக்கிடமாக இருந்தாலும், அச்சப்படும் அளவுக்கு இல்லை என்றும் சுகாதார அமைச்சு கூறியுள்ளது.
இதனிடையே, உயிரிழந்தவர்களின் குடும்பங்களுக்கு தலா 2 லட்சம் ரூபாய் நிவாரணம் வழங்க தமிழக முதலமைச்சர் ஜோசப் விஜய் உத்தரவிட்டுள்ளார்.
மேலும், உயிரிழந்த தொழிலாளர்களின் உடல்கள் அரசு செலவில் சொந்த ஊர்களுக்கு அனுப்பி வைக்கப்படும் என்றும் அறிவிக்கப்பட்டுள்ளது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30
(ஆஸ்ட்ரோ 502)
